Usa ka lalaking naa sa drug watchlist ang nasikop sa kapolisan sa Station 1, Divisoria sa gihimong Drug buy bust operation alas 9:50 kagabie sa Demetrio Street, Pinikitan, Barangay Camaman-an ning syudad.
Suspek mao si Manuel Alvinez, 38 anyos, ulitawo ug residente sa MV, Ramonal Street, Barangay Nazareth.
Si Alvinez, nasikop pinaagi sa pagpanguna ni Police Sr. Insp. Rogie Cabalquinto Ortencio, Officer in-charge sa Station One, Divisoria uban ang drug enforcement team.
Nadakpan ang suspek human kini mapalitan sa gamayng sachet nga dunay sulod gitoohang shabu nga nagkatidad og 500 pesos.
Nasayran nga nagpakaaron-ingnong buyer si SPO1 Dandie Eslapor gamit ang 500 pesos nga buy bust money.
Lakip sa nakuha sa posisyon ni Alvinez ang laing tulo ka gramo nga shabu nga dunay market value nga 1, 500 pesos.
Samtang, ang inventory nga gihimo mismo sa area gisaksihan ni Camaman-an Barangay Kagawad Alicia Cabili.
Sa karon, kasamtangang gi-detain sa Police Station 1, Divisoria si Alvinez alang sa dugang imbestigasyon.
