Sa interview sa DXDC RMN Davao kang Police Major Mark Lester Jalon, station commander sa Baguio Police Station, iyang giila ang biktima nga si Pepito Ariquin, 44 anyos, poultry employee ug residente sa Maligatong, Barangay Tawan-Tawan, Baguio District, Davao City.
Saysay sa katrabaho sa biktima nga si George Adsic ug Darwin Obtiar, alas 7:20 sa gabii niadtong Sabado, November 18, 2023 sa dihang pauli na sila sakay sa motor nga gimaneho ni Ariquin, mitabok sila sa creek apan tungod sa kasulog sa tubig, nawad-an kini’g kontrol ug didto na naanod ang ilang kauban, nga dali usab nilang gi-report sa otoridad.
“Giingnan nila ang driver nga buhian na ang motor. Dili man gyud niya buhian kay pagtuo niya’g kaya pa niya gunitan. Tapos bigla mang mas nikusog ang current (sa tubig), so na-washout sya,” saysay ni Jalon.
Matud sa pulis nga walay foul play ang insidente, diin subay sa imbestigasyon, concussion (traumatic brain injury) ug mga samad sa ulo ang hinungdan sa kamatayon sa biktima.
RadyoMaN Kirby Manzon
