Davao City – Gituohang personal nga bangi ang motibo sa pagpanunggab sa usa ka lalaki nga nahitabo sa El Rio phase 5 subdivision ning syudad sa Davao bandang alas 6 sa gabii niadtong Hulyo 15, 2018.
Sa report gikan sa San Pedro PNP, nakaangkon og samad dinunggaban ang biktima nga giilang si Al Razhed Duaran Macailing, 23 anyos ug residente sa B18, L31, El Rio Phase 5 subdivision ning syudad.
Samtang giila usab ang suspek nga si alyas “Migo”, 20 anyos, ulitawo, laborer ug lumolupyo sa Tugbok ning dakbayan.
Base sa imbestigasyon nga adunay saksi nga nakakita diin matud pa nga samtang naglakaw ang biktima pauli ug human og palit og softdrinks, gidunggab kini sa nahisgutang suspek ug naigo sa likod nga bahin sa lawas niini.
Daling gidala ang biktima sa ospital aron sa pagpatambal ug padayon pang ginaimbestigahan sa kapulisan ang maong insidente.
Justin Togonon, UIC intern
