Sa report gikan sa Mandug Police Station, ang biktima nga giilang si Maria Theresa Fuentes Quistoy, 21 anyos, residente sa Holy Cross Agdao, Davao City misakay og payong-payong gikan sa Brgy.Mandug Gym. Samtang padung kini sa Milan, Buhangin, ang suspek kalit nga nibunlot sa wala matinong kalibre sa armas dayon mideklarang hold-up sa biktima ug pugsanong gikuha ang sling bag niining kolor brown nga duna’y sulod nga kuwarta, cellular phone ug Valid’ ID’s.
Sumala pa, ang suspek daling misibat sa maong dapit paingon sa Deca Tigatto area samtang midagan ang biktima aron mangayog tabang sa Intel Personnel sa Mandug PNP.
Daling nagpahigayon og hot pursuit operation ang kapulisan apan imbes nga motahan ang suspek mibunot kini og wala matinong armas ug gipusil ang mga kapulisan rason sa paspas nga pagbalos sa otoridad resulta sa pagka neutralize sa suspek.
Gisuwayan pa kini og dala sa Southern Philippine Medical Center (SPMC) apan gideklara sa mga attending physician nga dead on arrival.
Narekober sa SOCO team gikan sa crime scene ang usa (1) ka unit nga revolver caliber .9MM nga walay serial number, duha (2) ka basiyo sa bala sa kalibre .9MM, usa (1) ka shoulder bag nga kolor brown (Secosana Brand), usa (1) ka unit sa IPHONE XR nga kolor itom, cash money nga nagkantidad ug P5,400.00 pesos, usa ka pitaka nga kolor itom nga adunay mga IDs, ug 1 unit nga motorsiklo nga SUZUKI SMASH 115 color green nga adunay side car nga color pink.
Sa pagkakaron padayon pa ang imbestigasyon aron mailhan ang suspetsado nga nakasuot og short pants nga color sky blue, medium built, gibana-banang 5’5 ang gitas-on ug nagpangidaron og 40-45 anyos.
RadyoMaN Don Pulayao
