Davao City – Nangalap gihapon og mga testigo ang Davao City Police Office (DCPO) sa brutal nga pagpatay sa usa ka lalaking napalgan sa dagat sa Punta Dumalag, Matina Aplaya, Davao City.
Sumala ni DCPO City Director Police Col. Kirby John Kraft, mga pamahayag pa lang sa pamilya ang ilahang gihawiran karon aron sa pagkuha og posibleng lead ngadto sa mga suspek sa krimen ug motibo sa pagpatay sa biktimang si Luis Malinao.
Hapon niadtong Enero 20, 2021, narekober ang patayng lawas niini nga giputos og packaging tape ug aduna pay mga hikot nga nabilin sa lawas sa biktima.
Gikumpirma usab sa ka-live-in partner niini ngadto sa kapulisan nga nalambigit kini sa iligal nga droga.
Gawas sa droga, gisusi pa sa mga awtoridad kung nalambigit ba kini sa ubang krimen.
Pila ka adlaw human nakita si Malinao, aduna usab laing patayng lawas nga nakitaan og samad pinusilan ang lawas ug gibalot usab ang dagway og packaging tape nga nakita sa dagat sa Sta. Maria, Davao Occidental.
Gimando ni Kraft sa hepe sa Ecoland Police Station nga makigkoordinar ngadto sa Sta. Maria, Municipal Police Station sa Davao Occidental kinsa nihawid usab sa imbestigasyon aron masuta kung konektado ang duha ka mga insidente.
RadyoMaN Aimee Guinita
