Sa interview sa DXDC RMN Davao kang PSSg. Ronelyn Gomez, imbestigador sa Matanao Municipal Police Station (MPS), iyahang giila ang biktima nga si Edmar Lumogdang, 41 anyos, minyo nga taga Purok 4 Brgy. Poblacion, Tacurong City, Sultan Kudarat.
Matud ni Gomez nga human nga mikatag sa social media ang insidente, gilayong nakig-alayon sa Matanao MPS ang iyahang pamilya ug didto ilahang gikumpirma nga ilang kabanay ang biktima pinaagi usab sa tattoo sa lawas niini.
“Kini daw sya (biktima), Sabado pa wala na nakauli. Mao ‘to, ilahang gianhi diri sa Matanao Municipal Police Station. Ilahang gisubay ug mao ‘to, gikumpirma sa iyahang igsoon, nga iyaha gyud ‘tong igsoon (ang lalaki),” saysay ni Gomez.
Nasayrang nakahiagum ang biktima og tulo ka samad pinusilan sa ulo diin .45 nga pistola ang gituohang gigamit sa krimen. Posible usab nga gilabay lang sa Matanao ang biktima sa laing lugar gipatay. Matud sa imbestigador, padayon pa nilang gina-establisar ang motibo sa krimen.
RadyoMaN Kirby Manzon
