General Santos City—Anaa karon sa talandugong kahimtang ang usa ka John Stephen Roldan, legal age, residenti sa Purok Veterans, Barangay Calumpang, Gensan human giluba sa wala pa mailhing suspek alas 11:00 ang takna sa gabie sa may Purok Balunto, Barangay Labangal, Gensan.
Sumala ni Justine, amigo sa biktima nga igo ra silang nangaon ug balot uban ang biktima ug usa pa nila ka amigo dihang kalit lang silang gisita sa grupo sa mga lalaki gumikan matud pa sa ilang pagsaba-saba.
Maayo usab nilang giestorya ang mga nasampit ug gipasabot nga wala siya nagsaba-saba sukwahi sa pasangil ngadto kanila sa mga suspek nga nagsige sila ug syagit.
Nilakaw ang mga suspetsado sakay sa motorsiklo apan pila lang kaminutos ang nakalabay namalik ug didto na gidunggab si John Stephen igo sa iyang kilid nga bahin.
Paspas dayon nga nanibat ang mga suspek sa wala sayring lugar samtang ang biktima daling gidala sa Gensan medical Center sa barangay Calumpang. Sa karon ginaatiman pa pag-ayo gumikan sa kritikal niining kondisyon.
