Selda maoy gikasangputan sa usa ka lalaki kinsa ilawom sa ilimnong makahubog ug nanghasi sa panimalay didto sa Barangay Antipolo sakop ning syudad.
Si Sergio Pagador Maghanoy, 35 anyos, ulitawo, residente sa Barangay Ponot lungsod sa Jose Dalman ug temporaryong nagpuyo sa Barangay Owaon sakop sa syudad sa Dapitan ang gidala sa mga barangay opisyales sa Antipolo sa kuerpo sa kapolisan sa dala na ang duha ka mga sundang niini.
Sa imbestigasyon sa kapolisan nasayran, nianang mga alas 8:30 ang takna sa gabie kaniadtong Nobyembre 16, si Maghanoy kinsa gituhoang ilawom sa impluwensiya sa ilimnong makahubog ang kalit nga miadto sa panimalay sa usa ka Jay Ras Eguia ug nanghagit ug away lakip na sa kauban niini. Apan gisugyotan lamang kini nga mouli.
Sa dihang nahibalik ang suspetsado, nagdala na kini ug duha ka mga sundang diin gibadlong usab kini sa mingresponde nga si Kagawad Vidal Calalang, Jr. apan wala kini mituo ug gihasi usab ang kagawad maoy hinungdan nga migamit kini sa pwersa aron mailog ang maong mga sundang.
Nabawi gikan sa suspek ang duha ka mga hinagiban nga adunay gitas-on nga 16 ngadto sa 22 pulgada lakip na ang kuptanan.
Kasong resistance and disobedience of a person in authority ang gikatakdang ipasang-at sa korte batok sa suspek.
-30-
