LANAO DEL NORTE POLICE, ADUNA NAY BAG-ONG PROVINCIAL DIRECTOR

45

Milingkod na sugod kagahapong adlawa, Lunes (Disyembre 14), ang bag-ong officer-in-charge (OIC) sa Provincial Police Office sa Lanao del Norte (PPO LDN) nga si Police Col. Isaias Bacurnay, isip hulip kang Col. Rolindo Suguilon.
 

Gipahigayon alas-8:30 sa buntag ang change of command ceremony, human sa flag raising sulod sa headquarters sa PPO LDN sa Barangay Pigcarangan, lungsod sa Tubod, sinaksihan sa mga opisyales gikan sa rehiyonal nga buhatan sa Police Regional Office (PRO) 10.  


Sa iyang acceptance speech, misaad si Bacurnay nga iyang ipadayon ang iyang liderato nga adunay pagkamapa-ubsanon apan anaa ang kalig-on.  

“We will focus on imposing strict discipline among erring personnel, intensified campaign against criminality and illegal drugs, enhanced programs for crime prevention and suppression as well as strengthened public engagement,” pamahayag ni Bacurnay.  
Si Bacurnay, kinsa membro sa Philippine National Police Academy (PNPA) class 1998, kanhi hepe sa Regional Operations Management Division (ROMD) sa PRO 10 ayha siya gi-assign isip OIC sa PPO LDN.
  Si Suguilon, membro sa PNPA class 1995, ang nabalhin isip OIC sa PPO Misamis Occidental.  
Milungtad lamang sa lima ka bulan ang tour of duty ni Suguilon sa Lanao del Norte nga nagsugod niadtong Agosto 3 hangtud Disyembre 14, karong tuiga.  

Human sa change of command ceremony, gikuyugan pa ni Suguilon si Bacurnay aron mo-kortesiya kang Lanao del Norte Gov. Imelda Dimaporo sa iyang buhatan sa capitolyo sa lungsod sa Tubod. (Divina M. Suson, December 15)

Facebook Comments