Isa ang patay kag duha ang nakaluwas sa nagluntad nga landslide sa Panian open pit mine sa Semirara, Antique sang Dominggo sang gab-i.
Ginkilala ang napatay nga si Lpath Equia Felipe, 23 anyos sang Barangay Banago, Caluya, Antique.
Nakalab-ot naman kay Antique Governor Rhodora Cadiao ang nasambit nga insidente.
Base sa nabaton nga report ni Governor Cadiao, naga-roving ang biktima nga si Lpath Felipe kaupod sa duha sini nga kaupdanan sa Molave Mining Project sang Semirara Mining Corporation sang hinali nga nagluntad ang landslide kag natabunan sila sang duta.
Napatay sa insidente si Felipe apang nahingagaw naman nga madala sa ospital ang duha niya ka kaupod.
Ginpasiguro man ni Cadiao nga kon may kapabayaan nga makit-an sa bahin sang SMPC, indi ini pag-itolerar sang lokal nga panguluhan sang Antique.
