Sa pakighinabi sa DXDC RMN Davao kang Dealoja nga trabahante sa APEX mining, iyang giangkon nga gidawat na niyang daan nga malubong siyang buhi sa landslide sa dihang wala siya nakaambak gikan sa iyang gisakyang bus.
“Nakaingon na gyud ko nga patay nako. Kay niingon naman ko sa akong hunahuna nga, naghunahuna nako sa akong anak ug asawa ba. Ingon nako nga pasayloa ko ninyo, patay na gyud ko karon,” butyag sa survivor.
Iyang gisaysay nga sa dihang nahunahunaan niya ang iyang pamilya, naningkamot siya og gawas o tabok sa bintana sa duha ka nagtapad nga bus aron makaluwas dala ang kahadlok nga basin masigundahan pa ang maong landslide.
Samtang, inay malipay nga siya naluwas, misamot ang ilang kabalaka tungod ang iyang igsuong si Dennis Dialoja kinsa nadat-ugan usab sa yuta, nagpabilin gihapon nga missing hangtod karon.
“Na-contact, nakit-an naman gud ko sa akong mga paryente sa Tagum nga okay nako na. Akong kuya nalang gyud akong problema. Maningkamot pud kog update kung unsa may balita ato niya, naunsa ba to siya karon. Dawat pud nako kung wala na siya pero nakahunahuna sad ko nga kung natabunan man siya, naa lay nagaharang nga bisan unsa lang diha nga mga butang nga dili siya mapisat ba. Kaginhawa gihapon siya, dili lang siya kagawas kay nakulong lang, ing-ana ra akong hunahuna,” dugang pamahayag pa ni Dealoja.
RadyoMaN Ivy Parido
