Davao City – Dili pa matumbok sa Buhangin PNP kung gituyo ba og pagsunog ang stock room sa Lapanday Development Cooperative (LADECO) sa Mandug Sabado sa hapon.
Kini human gidudahan nga posible dunay nagdabdab sa stock room sa LADECO gumikan sa long neck nga nakita sa likod nga bahin sa Lapanday ug dunay unod nga gasolina alas 9:00 gahapon sa buntag.
Gisulti ni SPO1 Galban sa Buhangin PNP nga nagsugod ang pag-ulbo sa kalayo bandang alas 4:00 sa hapon niadtong Sabado apan maayo na lang kay paspas napalong sa mga sekyu ug sa mga Special Civilian Active Auxilliaries (SCAA) sa 72nd IB kinsa miresponde sa mao nga insidente.
Nakahiagom lang og partial damage ang stock room human wala na mukanat ang kalayo sa tibook gambalay ug nadeklara nga fireout alas 5:00 na sa hapon ug anaa sa 45 mil pesos ang kinatibuk-ang damyos.
Kahinumduman, gisunog sa teroristang CPP-NPA-NDF sa pagpanguna ni kumander Jinggoy ang mga pasilidad sa Lapanday sa tulo ka area nga midamyos og kapin usa ka bilyon ka pesos sa miagi nga tuig.
Ang krimen sa mga teroristang CPP-NPA-NDF nagresulta sa pagsirado sa kompanya mao gatusan ka mga trabahante ang nawad-an og trabaho niadtong higayona.
RadyoMaN Joel Viray
