Davao City – Aron maseguro nga hapsay ug walay sami ang paglista sa mga benepisaryo sa Social Amelioration Program (SAP) sa Department of Social Welfare and Development (DSWD), gitukod sa Barangay Lasang ang Task Force COVID-19 sa matag purok.
Matud ni Lasang Barangay Captain Allan Simo-ag, ang Task Force COVID maoy mag-determinar kinsa ang mahimong benepisaryo sa SAP ug maoy mag-systematize sa proseso aron walay mag-dobleng entry sa mga pangalan, busa ang tanang gilista miagi gayud sa makuting validation una pa man kini gipasa ngadto sa kapitan ug i-forward ngadto sa DSWD.
Kahinumdoman nga bag-ohay pa lamang, nahimong dakung isyu ang report nga mokabat sa 22,000 ka mga ‘duplicate SAP beneficiaries’ nadiskubrehan sa DSWD samtang nag-validate sa listahan sa first tranche releases.
Gawas sa Task Force COVID, gi-montar usab sa Barangay Lasang ang usa Grievance Committee diin ang mga residente makasumbong kon makataho batok sa ilang mga silingan nga nagdoble ang nadawat nga emergency assistance sa gobyerno.
Dugang sa kapitan, sagad sa gisumbong sa komitiba mga mag live–in partners gani migawas sa imbestigasyon nga ang mga benepisaryo sa SAP dili gayud sila mismo apan ang ilang mga anak sa wala pa sila mag-ipon diin nakalusot usab sila sa post-validation nga gibuhat sa DSWD.
Dugang sa amahan sa Barangay Lasang, nagbuhat usab sila og livestreaming platform presentation matag gabii aron ipasabot ngadto sa ilang katawhan ang matuod nga dagan sa cash assistance diin dali ra usab kini nilang maaksyunan.
Gipasabot sa maong opisyal nga gituyo nila og montar ang tulo ka mga sistema kon mga pamaagi sanglit dili nila buot nga mabinuangan gani maprotektahan pa ang pondo sa gobyerno pinaagi sa paghatod sa hinabang-pinansyal solamente ngadto lamang sa lehitimo nga mga benepisaryo sa nasangpit nga programa.
Malipayong gi-anunsyo ni Simo-ag ang hapsay nga dagan sa unang distribusyon sa SAP sa ilang komunidad sa miaging mga bulan ilabi na gumikan kay nahan-ay ug nahasubay gayod ang ilang mga aksyon sa saktong proseso sa pag-identify ug pag-double check sa mga SAP beneficiaries.
Masaligon si Simo-ag nga kon unsa ka plastada sang unang distribution mao usab kana ang sistemang ilang gi-ekspektar atol sa second tranche sa pag-apod apod og hinabang-pinansiyal sa mga benepisaryo pipila ka adlaw gikan karon.
RadyoMaN Joel Viray
