Davao City – Nakapupo og negatibo nga impresyon sa Trade Union Congress of the Philippines (TUCP) ang nasudnong kapulisan isip tigpatuman sa atong mga balaod.
Nakapanghinaway si TUCP spokesperson Alan Tanjusay sa kapasidad sa kapulisan tungod kay wala kuno’y igong gibangkaagan sa sakto nga pagpatuman sa balaod diha sa pagsikop sa mga suspek pa lang sa krimen.
Gibatbat ni Tanjusay nga daw gina-short cut sa mga law enforcers ang pagdakop sa malapason sa balaod sama sa trapiko, pagpanikas sa buhis, pagdakop sa mga kriminal ug daghan pang uban.
Ang labaw nga gikinahanglan sa mga tinugyanan sa balaod karon mao ang pag-overhaul ug tudluan sila sa sakto nga protocol sa pagpatuman sa balaod sa ingon dili sila magtira pataka na lang, dugang ni Tanjusay.
Ang pagka-ningas cogon sa mga tinugyanan sa balaod dili lamang nagsumikad sa kakuwang sa training apan gumikan usab sa pagkahaylo sa uban sa salapi ug kurapsyon butang mas angay palig-unon ang mga otoridad sa natad sa igong kahibalo sa ilang trabaho.
RadyoMaN Joel Viray
