Mahayag, Zamboanga del Sur – Nakaplagang naglutaw sa sapa ug wala nay kinabuhi ang usa ka puya sa Purok Peña, Barangay San Isidro, Mahayag, Zamboanga del Sur alas 3 kagahapon sa hapon.
Sa pagresponde sa Mahayag PNP kauban ang taga Municipal Health, nasaksihan niini ang luspad nga hitsura ug wala nay kinabuhi nga batang babaye nga aduna pay pusod ug inunlan. Padulong na sa pagkalata ang lawas sa maong puya nga gituohang gilabay sa wala pa mailhing indibidwal nga gitoohang bunga o resulta sa unwanted o teenage pregnancy.
Saysay sa kapulisan, unang nakadiskubre sa lawas sa biktima ang 12 anyos nga batang lalaki nga taga Purok Antolihaw, Barangay San Isidro, Mahayag, mga alas 3 kagahapon sa hapon.
Gilubong gidayon sa mga opisyales sa maong barangay ngadto sa Sandal Cemetery ang nasangpit nga bata kagahapong adlawa.
Samtang padayon pa nga giimbestigahan ang maong krimen alang sa posibleng pag-ila ug pagsikop sa mga responsable sa pagpatay sa walay sala nga bata.
(Photo: Mae Cynare Tumatao)
