Davao City – Gidominahan sa mga taga Davao region ang listahan sa nagtop sa bag-uhay lang gipagula nga March 2018 Licensure Examination for Teachers kun LET Elementary ug Secondary education.
Base sa resulta nga gipagula sa Professional Regulation Commission (PRC), 24 ka mga top notchers ang nag gikan sa Davao Region diin 15 ang gikan sa University of Southeastern Philippines Tagum ug Davao, pito gikan sa University of Mindanao sa Davao, Tagum ug Peñaplata, usa gikan sa Cor Jesu College samtang usa usab sa Holy Cross of Davao College.
Gani sa interview sa DXDC RMN Davao, mapasalamaton ang USeP student regent sa Tagum nga si Teofilo Sevilla diin trese gikan sa USeP-Tagum ang nag-top sa maong exam.
“Ang USeP kay dili lang man ingon nga naga-create og professionals nga diha lang kutob but we are aiming for excellence. Salamat kaayo sa mga nag-top nga gihatagan nila og dungog ang USeP,” sigun ni Sevilla.
Lima ang top notchers sa USEP-Tagum sa Elementary Education samtang walo sa Secondary education.
Tungod niini, base sa gipagulang press release sa maong tulunghaan, garbo nila ang paghulma og mga graduates kinsa mga service-oriented ug adunay daghang nahibal-an ilabi na sa ilang napiling propesyon.
RadyoMaN Renz Barbarona
