Davao City – Dili masukod ang kalipay nga gibati sa ginikinan ni Chanda May Dequito Sumiga, 28-anyos, taga Brgy. Ngan, Sitio Valma, Compostela, ComVal Province, top 3 sa Licensure Examination for Teachers (LET), nga nagtungha sa Legacy College of Compostela (LCC) sa kursong Bachelor of Elementary Education (BEEd) – Generalist.
Sa pakighinabi sa DXDC RMN Davao kang Mr. Roger ug Mrs. Milaluna Sumiga, ginikanan sa top notcher (92.60%), gibutyag niini nga dako ang ilang pagpasalamat sa Ginoo sa naabot sa ilang anak diin pagpasar lamang sa LET ang ilang gi-ampo sa Kahitas-an.
“Grabe gyud among kalipay. Proud kaayo mi sa iyahang naabot. Ug kanang tanan para lang gyud na sa iyaha dili kay para sa amoa lang. Labaw na nga para gyud na sa iyang kaugmaon,” saysay ni Mrs. Sumiga
Saysay sa ginikanan niini nga sauna pa, suportado na nila ang pagtuon sa ilang anak diin pirmi kining una sa ilang klase.
Panawagan usab sa nahisgutan sa susama nilang ginikanan nga suportahan ang ilang mga anak bisan pa man sa kalisod basta aduna lamay ambisyon, plano ug pagpaningkamot, mamahimo kining posible sa tabang sa Ginoo.
Subay sa Professional Regulation Commission (PRC), 19,659 elementary teachers sa 72,054 examinees o 27.28% ug 22,271 secondary teachers sa 85,823 examinees o 25.95% ang mipasar sa maong board examination.
RadyoMaN Kirby Manzon
