TACLOBAN CITY – Naatubang hin kaso nga graft ha Sandiganbayan hi Isabel, Leyte Mayor Saturnino Medina Jr. ngan duduha pa nga personalidad tungod han pagpalit han mga sarakyan.
Ha papel nga ginpakita han Ombudsman ha media, naatubang ha pagtalapas han section 3 han Anti-graft and corrupt practices act hira Mayor Medina, Perla Brebante, anay Municipal Administrator ngan Nolette Medina.
Gin-aaligar dida han Agosto 2010 tubtob Desyembre 2010, nagburublig an tutulo nga maaprobahan an ginpamalit nga duduha nga sarakyan para ha munisipyo, usa nga van nga gin-aaligar gintatag-iyahan han asawa ni Medina pero naka-register ha ngaran nga Nolette nga nagkakantidad P546,000.00 pero P396,000.00 pesos la an market value hini ngan sarakyan nga gin-aaligar naman nga gintatag-iyahan ni Brebante nga nagkakantidad P648,500.00 pero P600,000.00 la ngayan an market value hini.
Sumala han charge sheet, ginkumkom han mga akusado an nagkakantidad P198,500.00 nga sobra han pamalit han mga sarakyan.
Naatubang gihapon an tutulo nga akusado ha pagtalapas ha section 3 anti-graft law.
