TACLOBAN CITY – Gin dig-unan han mga gintudlok nga Board of Directors ni Tacloban City Mayor Cristina Romualdez nga pabor ha ira an gumawas nga court/ omnibus order ni Presiding Judge Leonito Sabandal dida han Pebrero 2, 2018.
Nagkamay-ada man gud hin magkaiba nga interpretasyon an duha nga grupo ha mao nga court order ngan pareho nga nasiring nga ha ira napabor an korte.
Makikita man gud ha mao nga court order nga may partikular nga statement an korte.
Sumala kan Atty. Butch Corpin, myembro han City Board of Directors, an partikular nga statement han korte in gintatawag nira nga Obiter Dicta o an Incidental Expression of Opinion han Judge pero diri daw ini nangangaruyag sidngon nga asya na an kabug-usan nga order.
“Technically kun abugado kamo, this are the obiter dicta of the part of the order. Diri ini amu an namamahala an karuyag sidngon kan korte, diri ito amu an kinahanglan sundon han parties, kay an kinahanglan sundon ha balaod an dispositive portion nga makikita ha last part han order.” – Atty. Corpin.
Pero gindig-unan naman liwat han B-O-D han Leyte Province nga napabor ha ira an court order tungod nga nagtikang an court ruling ha page 4 nga nagsisiring nga an B-O-D han Leyte in nagpapabilin nga board of directors han LMWD.
