TACLOBAN CITY – Gintagan hin award han Dept. of Science and Technology o kun DOST an student pride han Leyte pag-abot ha science, hi Hillary Diane Andales han Philippine Science High School-Eastern Visayas.
Ha courtesy call ni Andales kan DOST. Sec. Fortunato Dela Pena, nalilipay an mao nga opisyal nga usa nga pilipina an nagdaog ha International competition kun diin 11, 000 nga mga estudyante tikang ha iba-iba nga nasod han kalibutan an nagpa isan-isan han ira kabaltok ngan talento pag abot ha syensya.
Ha 3rd Breakthroughjunior challenge ha NASA Research Center ha Silicon Valley, California USA, nakab-ot ni Andales an iya hingyap nga magdaog ha mao nga kompetisyon.
An Breakthrough junior challenge in ginkokonsidera nga kumo “Oscars” han science.
Yana, igindugang han DOST hi Andales ha mga nakakarawat han award nga “Mga Bagong rRzal: Pag-asa ng Bayan” tungod han iya makusog nga adbokasiya ha science, technology, engineering ngan math education ngan awareness.
Ini nga award in para ha mga Pilipino nga nagpakita hin extraordinary nga abilidad ha magkadurudilain nga paisan-isan nga gindadara an paghigugma ha nasod, kabataan nga pareho han aton national hero nga hi Dr. Jose Rizal.
