LGBT suportado ang pagdeklara’g ‘persona non grata’ kay Pura Luka Vega sa Davao City

Davao City – Giuyonan sa Friendly Club LGBT Organization sa Davao City ang pagdeklarang ‘Persona non grata’ sa drag performer nga si Pura Luka Vega human sa iyang pipila ka mga performance nga nakabastos ug nakatunob na sa tinuohan sa mga Katoliko sama sa pagsundog niini sa mga balaang imahe pinaagi sa mga law-ay nga pasundayag.

Sa pakighinabi ni RadyoMaN Misel Miral-Galve kang Roger Alipio, Vice President sa Friendly Club LGBT Organization, atol sa Straight to the Point Morning Edition, gipaabot niya nga suportado sa ilang grupo ug sila dakong uyon nga himuong ‘unwelcome’ ang performer dinhi sa dakbayan tungod sa pagbinuang ug paghimo niini og kataw-anan sa pag-ampo sa mga Katoliko.

“Isip man gud usa ka LGBT, dapat para ma respeto pud ka, imo pung buhaton ang karespe-respeto sad nga mga lihok,” matud ni Alipio.

Dugang pa nga sila nanghinaut nga madunggan ug mahisgutan kini sa Davao City Council aron sa hingpit dili na makatuntong si Pura Luka Vega sa syudad.

Kahinumduman nga bisan pa og giulan na kini og mga batikos sa social media ug gideklara ng ‘persona non grata’ sa uban pang bahin sa nasud, siya wala gihapon makakat-on ug nagapadayon pa gihapon sa iyang mangil-ad nga binuhatan.

RadyoMaN Ivy Parido