Davao City – Padayon karong ginahisgutan sa Provincial Government Unit sa Davao de Oro ang rekomendasyon sa Department of Health (DOH)-XI nga pagpailawom sa probinsya sa Enhanced Community Quarantine (ECQ) tungod sa critical risk nga healthcare utilization rate (HUR) nunot sa Coronavirus Disease 2019 (COVID-19) cases.
Sa interbyu sa DXDC RMN Davao kang Alfonso Tabas, Jr., Provincial Inter-Agency Task Force COVID-19 Spokesperson, giluwatan niini nga kinahanglan nga matun-an pag-ayo ang rekomendasyon nga ECQ ayha kini ipatuman labi na nga dili kalikayan nga ubay-ubay ka mga indibidwal ang maapektuhan sama niadtong mawad-an og trabaho ug panginabuhian tungod sa maong istriktong quarantine classification.
Matud ni Tabas nga kung adunay bug-at nga rason ug kinahanglan na gayud nga ipailawom sa maong quarantine status ang probinsya, andam kanunay ang lokal nga panggamhanan nga mupatuman niini.
“Tan-awon sa nato ang validity unsa ba kabug-at (ang recommendation). I-review gyud kung unsa ba kay kabalo baya ka nga dali ang pagsunod but we have also to consider sa laing bahin. Kay kung muingon ka’g ECQ naka-experience na baya ta’g unsa na ka lisod. But if there is a need, I believe that the Governor (Jayvee Tyron Uy) will abide and then follow,” sulti ni Tabas.
Nasayran nga girekomenda usab sa DOH-XI nga ipailawom ang syudad sa Davao sa Modified Enhanced Community Quarantine (MECQ).
Bag-ohay lamang, gianunsyo sa health department nga nagdula sa Alert Level 3 ug 4 ang mga probinsya sa Davao Region sa COVID-19 cases kung basehan ang maong bag-ong metrics sa DOH diin ginapaabot na lamang ang ‘go signal’ kanus-an kini ipatuman sa rehiyon.
RadyoMaN Kirby Manzon
