Davao City – Buot karon ni Davao City Mayor Sara Duterte-Carpio nga paspasan ang pagbakuna sa mga magtutudlo batok Coronavirus Disease 2019 (COVID-19).
Matud sa alkalde nga mas maayo kung mabakunahan ang mga magtutudlo sa publiko ug pribadong eskwelahan isip pagpangandam kung itugot na ang face-to-face (f2f) classes.
“Gusto nato unta nga paspas ang pagbakuna sa ilaha (magtutudlo) so that in the event nga muingon ang DepEd nga face-to-face (f2f) classes may be allowed in LGUs nga mag-apply for f2f classes or muingon ang DepEd nga pwede na, ready na ang atong mga teachers because 2 doses vaccinated na sila,” sulti sa alkalde.
Malaumon si Mayor Sara nga hinay-hinay nga mabalik ang face-to-face classes sa dili madugay ilabina kung tugtan sa Department of Education (DepEd) sa pag-apply sa Local Government Unit (LGU) alang niini o ang mismong departamento maoy mohatag og pagtugot sa lokal nga gobyerno.
Mituo si Duterte-Carpio nga lahi ra ang edukasyon sulod sa eskwelahan kung itandi karon nga anaa sulod sa panimalay ang pagtuon tungod sa pademya.
RadyoMaN Kirby Manzon
