Gipatin-aw sa kagamhanang lokal sa Marawi City nga walay kumpirmadong kaso sa 2019 novel corona virus sa dakbayan sukwahi sa gipagawas sa social media.
Kini taliwala sa nagkadaghang kaso sa nasud ug sa kalibutan nga mikalas na usab og kinabuhi niadtong mga nataptan niini.
Hinoon, miingon si Marawi Mayor Majul Gandamra nga adunay usa ka indibiduwal nga gikonsiderang person under monitoring tungod kay gikan kini sa siyudad sa Macau sa China apan wala kini nagpakita’g simtomas o senyales sa maong sakit sama sa hilanat o flu.
Dili kini, matud pa, taga-Marawi apan adunay kabanay didto nga mi-bisita.
Makonsiderang person under monitoring o PUM ang usa ka tawo kung naka-biyahe kini sa mga nasud nga adunay kumpirmadong kaso sa NCO-V apan walay gipakitang simtomas.
Ipa-ilawom gihapon siya sa self-quarantine ug dili tugutang maka-suroy suroy sulod sa 14 ka adlaw nga maoy gidugayon sa incubation period sa NCO-V.
Wala pa ma-klaro kung asa nag-self quarantine ang maong tawo.
Sa pikas nga bahin, gimugna sa probinsiyal nga kagamhanan sa Lanao del Sur niadtong nakalabay’ng semana ang inter-agency task force batok sa NCO-V.
Mao kini ang mo-monitor ug mohimo’g mga lakang aron mapugngan ang pagkatag sa NCO-V sa Marawi City ug sa probinsiya.
Sa maong panagtagbo, gi-awhag ni provincial governor Mamintal Adiong Jr., ang 39 ka mga mayor sa Lanao del Sur nga hugtanong i-monitor ang ilang matag lungsod ug siguraduhong andam ang matag municipal health facility.
Kinahanglan usab, matud pa, nga pahugtan ang information and education campaign o IEC kabahin sa proper hygiene and health care o hustong paglimpyo sa kaugalingon ug sa palibot. (Divina M. Suson, February 11)
