Roxas City, Capiz – Pila ka mga units sang jeep ang ginpahamtang sang gobyerno sang syudad para sa Libre Sakay sa mga Private Hospital Workers sa Roxas City.
Ginkumpirmar ni Mr Glen Amane, nag-umpisa ang Libre Sakay sang Biernes sang nagligad nga semana kun sa diin may yara sang tig-apat ka mga units sang jeep ang ginbutang sa mga border points agud nga mag-transport sang mga indibidwal nga nagatrabaho sa mga pribado nga ospital sa syudad.
Suno kay Amane, ini ang nangin sabat sang city government tuhoy sa henyo sang tagdumalahan sang mga private hospitals angut sa kabudlay sa pagpanakayon sang mga personnel kag staff sang mga ini matapos nga ginpa-untat ang mass transportation bangud sa Enhanced Community Quarantine tuga sang COVID-19.
Ang mga jeep nga nagabiyahe humalin alas 5 sang aga sa 5 ka border points nga ginlakipan sang Balijuagan, Lonoy, Adlawan, Loctugan kag Tanza kag direkta nga magadul-ong sa mga pasahero padulong sa ila ginatrabahuan nga ospital.
Samtang may mga tricycle na kita nga gin-provide apang mas ginpakamaayo sang Roxas City Government nga ilunsar ang Libre Sakay sa Jeep agud masulod ang mga barangay nga malayo sa sentro sang syudad kag ospital.
