Gitinguha karon sa Cagayan de Oro City Anti-Drug Abuse Council kon CADAC nga mahatagan og libreng serbisyo ang mga Tokhang responders nga angay ibutang sa rehabilitation center.
Nasayran nga sa dili pa isulod sa rehabilitation center ang usa ka drug dependent, dunay mga proseso nga agian.
Lakip niini ang pagpa-ubos sa Drug Dependency Evaluation nga dunay bayad ug uban pang bayronon sama sa out-patient fee, drug testing charge ug in-patient admission.
Matud ni Kagawad Romeo Calizo, co-chairman sa CADAC nga daghan sa mga Tokhang responders ang dili maka-afford sa maong mga bayronon, hinungdan nga dili na usab sila masulod sa rehab center.
Alayon niini, mohimo og mga lakang ang CADAC aron hangyoon ang rehiyonal nga buhatan sa Department of Health (DOH) alang sa maong katuyoan.
