El consejal del destrito dos Honorable Miguel “Mike” Alavar III junto con el DXRZ-RMN Zamboanga y el Task Force Zamboanga ya done poco-mas-o-menos 5,000 maga reading materials con el Save the Children of War Basilan Foundation que ta encabesa el founder Dr. Arlyn Jawad Jumao-as intendido destribuji con el maga anac del pobre familia na provincia de Basilan.
Este en connecion tambien del programa di Alavar es “Read to Lead” donde en este manera ay pwede ayuda con el maga bata aprende le y entende pormedio del maga libro y otro maga materiales que ta usa na enseniansa del lejida.
El maga libro y otro materiales de lejida ay destribuji el foundation di Dr. Jumao-as na maga lugar na Basilan donde ta pasa tormento el maga bata anda na escuela porcausa el distancia y menos el maga escuela y maestra.
Por su parte tambien, con alegria y suporta si Alavar queda parte del programa di Dr. Jumao-as porcausa tiene estos el semejante advocacia na comunidad que es dale el proprio educacion con el maga pobre familia masquin donde parte del region.
Despues ya llena el truck del TFZ de libro, dayun este ya lleva na pantalan para hace munta para na Basilan donde ya recivi tambien con este el foundation.
