Dul-an sa 10,000 ka mga deboto ang nag-atang sa pag-abot sa mga imahen sa Birhen sa Guadalupe ug ni Sr. Sto. Niño sa National Shrine of Saint Joseph sa dakbayan sa Mandaue.
Ang pagduaw sa duha ka imahen nagpakita ug “Panagtagbo” sa Holy Family pinaagi sa balaang bata nga si Sr. Sto Nino , iyang inahan ang Birhen Maria ug amahan nga si Sr. San Jose nga maoy patron sa Mandaue.
Ang Deputy director sa Mandaue City Police Office (MCPO) nga si Supt. Jimmy Aguisanda nihulagway nga hapsay ug malinawon ang pag-abot sa duha ka imahen gikan sa Basilica del Sto. Niño sa Saint Joseph Shrine .
Matud ni Aguisanda moabot ngadto sa 270 ka mga polis ang gideploy alang sa kalihukan karong adlawa hangtud na ugma sa pagbalhin sa mga imahen ngadto sa parokya sa Birhen sa Regla sa Lapulapu City .
Pag-abot sa simbahan sa Saint Joseph , usa ka welcome mass nga gipanguluhan ni Msgr. Daniel Sanico ug ubang kaparian ang gihimo samtang ugma sa alas 2:00 sa kadlawon Enero 20 , himoon usab ang send-off mass alang pagbiya na sa mga imahen sa maong simbahan .
