LIFTED | Bangud sa madamo nga negatibo nga reklamo, dry run para sa odd-even coding scheme, ginpauntat!

21

Roxas City, Capiz- Ginkumpirmar ni Roxas City Vice Mayor Nonoy Erwin Sicad nga ginpauntat na ang pagpatuman sang dry run sang odd even coding scheme sa mga nagabiyahe nga tricycle sa syudad sang Roxas.
Ini ang ginpapanaog sang OIC Mayor nga si City Councilor Julius Abela matapos ang rekomendasyon nga ginhatag sang talatapan sang Traffic Management Unit(TMU).
Suno kay Vice Mayor Sicad, “effective immediately” ang nasambitan nga deriktiba.
Sa mahibaloan nga sa sulod lamang sang tatlo ka adlaw nga dry run, ini ang nag-ani sang madamo nga negatibo nga reaksiyon partikular sa mga tricycle driver kag mga commuters.
Pila ka mga rason kun ngaa ginrekomendar sang TMU sa gobyerno sang siyudad ang pagkakas na sang dry run sa odd-even coding scheme.
Suno kay TMU consultant Mr. Victor Arcenas,aminado sila nga nag-iban ukon naghagan-hagan ang trapiko sa nasambitan nga mga inadlaw apang sa pihak sini may yara man sang negatibo nga epekto.
Pila sa mga gintumod nila amo nga apektado ang pangabuhian sang mga tricycle driver bangud nga tatlo ka adlaw gid sa sulod sang isa ka semana nga sila ang ginadumilian nga maglaray sa mga dalanon sa syudad.
Nagresulta man ini sang delay sa mga transaksyon sang mga commuters bangud sa kadulaan sang tricycle nga sarang masakyan.
Ginpunto ni Arcenas, dako man ang benepisyo nga napatigayon ang nasambitan nga dry run bangud pinaage sini diri natumod kag nahibaloan ang mga positibo kag negatibo nga epekto.
Samtang ginpanugyanan ni Arcenas si TMU head Mr. Junie June Hervias nga striktuhon ang pag-obserbar sang no-parking, loading kag unloading areas agud nga malikawan ang pagpugok sang trapiko.

Facebook Comments