Davao City – Gibati’g tumang kahasubo si Association of Barangay Captains (ABC) President Edgar Ibuyan, Sr. sa gidangatan ni Barangay 10-A Punong Barangay Mark Cayetano kinsa apil naabtan ug nasikop sa operasyon sa kapulisan kontra iligal nga sugal kon tigbakay kon sabong sa miaging mga adlaw.
Matud ni Ibuyan, nasagmuyo siya sanglit unta ang mga kapitan maoy magsilbing tigpatuman sa mga balaud kontra iligal nga sugal ug maingon man sa health protocol apan sakit palandungon nga naapil si Cayetano nga nadakpan sa operasyon batok sabong dili pa lang dugay.
Sumala ni Ibuyan, wala siya magkulang sa iyang mga pahimangno sa iyang mga kaubanang kapitan sa asosasyon labot sa paglikay ug dili paglambigit sa iligal nga sugal sama sa sabong apan aduna gihapo’y wala mupatoo kaniya sama kang Cayetano kinsa apil sa laing 28 ka sabungero nga nasikop atol sa operasyon kontra sa sabong.
Segun sa konsehal nga bisan si Mayor Sara Duterte-Carpio daan nang nagpasidaan kanila kabahin sa pag ulo-ulo sa iligal nga kalihukan apan daw wala kini patalinghugi ni Cayetano gani milambigit na man hinoon kini sa maong iligal nga sugal.
Matud ni Ibuyan nga mag-agad una sila sa buhaton nga aksyon sa kapulisan pinaagi sa pagduso og kaso ug maingon man sa lakang sa Department of Interior and Local Government (DILG_XI) muhimo sa parte ang ilang organisasyon batok kang Cayetano.
Apan alang kang Barangay 9-A Kapitan Tata Llubit, angayan gayod pahamtangan og silot ang naasoy nga punong barangay aron wala na’y laing musundog kon mag apil-apil sa sabong inay mao na’y manakop og mga sugarol aron kalikayan ang pagkatag sa virus sa ilang mga dapit.
RadyoMaN Joel Viray
