Davao City- Gi-imbestigahan karon sa kapulisan sa San Pedro, ang lima ka mga suspetsado human nasikop sa follow-up operation kaganihang kadlawon nga maoy suspect sa pagdunggab patay sa usa ka ulitawo nga naghatud sa iyang uyab.
Ang mga dinakpan giila nga sila si Ryan Paul Braganza Mirasol, 20 anyos, nagpuyo sa Ilocano Vill.,Toril Davao City, Roy Pajo Revilla, alias Roy-Roy, 21 anyos, laborer nga taga-Kasilak, Bucana, Davao City, Sonny Dumael Diomadel, alias San-San, 19 anyos, ulitawo, Junel Dumael Diomadel, 29 anyos, minyo, parehong nagpuyo sa Kasilak Bucana Davao City ug Albaser Arellano Diomadel, 34 anyos, minyo, nga lumulupyo sa Barangay 21-C , Piapi Boulevard Davao City.
Nakuha gikan kang Ryan, Roy ug Sonny ang duha ka kitchen hunting knife ug mga ugang dahon sa marijuana.
Sila ang gitudlong mitabang sa pagdunggab patay sa biktima nga si Maverick Abellaneda Onggo, 21 anyos, ulitawo ug nagpuyo sa GK Relocation, Tibungco syudad sa Davao. Sumala sa report, alas 10:50 kagabii samtang naglakaw ang biktima kauban sa iyang uyab sa Purok 19-B Bilusa, Bucana, gisundan kini nila San-San ug Roy-Roy ug kalit nga gikulata ug gitabangan sa pag dunggab.
Kasamang Paul Canono
