Pagadian City – Naana sa luwas nga kahimtang ang lima ka mananagat nga gidagit sa mga tero¬ristang Abu Sayyaf Group human kining nakaikyas sa balwarte ni kumander Idjam.
Giila ang mga na-rescue nga sila si Vergel Arquino, Jushua Ybanes, Fausto Imo, Junald Minalang ug Spriano Sardido. Tres milyones ang kantidad nga gipangayo sa ASG bugti sa ilang kagawasan.
Gisulti ni Arquino ang ilang pait nga kasinatian samtang naa sa kamot sa ASG diin halos dili na sila makatulog ug makapahulay gumikan sa kanunay nga pagbaktas sa kabukiran.
Sumala ni Arquino nakahigayon sila sa paglayas dihang miataki ang militar og gipuntirya ang ilang nahimutangan. Nilugsong matud pa sila sa ubos nga bahin og nagpakitabang sa kasundaluhan og personahe sa Philippine Navy.
Giisip usab ni Sardido nga sayong pinaskuhan gikan sa Dios ang ilang pagkagawasnon gikan sa bandidong grupo.
Mahinumduman nga gidagit sa mga ASG ang mga biktima niadtong petsa 14 sa oktobre sa kadagatan sa Pangutaran, Sulu diin gidala sila sa lugar nga wala sila masayod.
Samtang nigahin usab og tabang pinansyal ang lokal nga kagamhanan sa syudad sa Pagadian sa mga biktima diin upat niini lumulupyo sa dakbayan.
