Lima ka tawo, samaran sa sunog sa Puntod ug Lapasan; tunga sa milyon ka pesos, damyos sa sunog

75
PC: RadyoMaN Noy Losentes & RadyoMaN Annaliza Amontos-Reyes

Lima ka mga tawo ang samaran sa kapin tulo ka oras nga sunog sa Saint John, Puntod ug San Isidro Labrador, Lapasan ning syudad sa Cagayan de Oro.

 

Matud ni  Senior Fire Officer 3 Samson Velarde nga ang lima ka mga biktima, napaso ug natunok sa mga lansang gikan sa  dapit nga nasunogan.


 

Tulo sa lima ka mga biktima nadala sa J.R. Borja City Hospital nga naila sa ngalan nga sila Sherwin Tahuyan, Nasario Ellazar ug Apolinario Diaz.

 

Dugang pa ni Velarde nga ang tulo ka mga biktima parehong napaso samtang si Carlito Ebaoc ug Richard Pahigan parehong natunok sa lansang.

 

Nasayran nga nagsugod ang maong sunog mga 8:50 kaganinang buntag diin ilang na-fire control alas 10:09  ug  ilang na-fire out alas 11:19 sa buntag.

 

Samtang, mikabat usab sa kapin tunga sa milyon ka pesos ang estimated structural damage sa maong sunog nga misaka sa 4th alarm matud ni Velarde.

 

Tungod sa kadako sa kalayo ug mga light materials miresponde ang kapin napulo ka mga fire trucks sa gobyerno  ug   private fire volunteers brigade.

 

Gibutyag sa  maong opisyal nga sigon sa ilang initial investigation, nagsugod ang maong  kalayo sa balay ni Apolinario Diaz.

 

Apan matud ni Velarde nga ila pang gihimo ang imbistigasyon.

 

Sa iyang kabahin, gi-angkon ni Diaz nga sa ilang balay nagsugod ang kalayo hangtud nga mikalat kini sa iyang mga silingan hangtud  nga na-ugdaw ang 39 ka mga balay.

 

Gipahayag ni Apolonario nga naglung-ag ang iyang asawa nga si Lucia alang sa ilang pamahaw.

 

Apan gibiyaan ni Lucia ang iyang linong-ag, gamit ang sunog nga kahoy kay dunay iyang gipalit sa tindahan nga distansiya sa iyang gibiya-an nga linong-ag sa ilang kusina.

 

Ang kapin sa 100 ka mga tawo nga biktima sa maong sunog, termporaryo nga gi-house karon sa covered court sa barangay puntod.

Facebook Comments

From Advertisers