Nagpapadayon la gihapon an gin dudumara nga Internal cleansing han Police Regional Office 8 ha bug-os nga rehiyon para ngadton mga kapulisan nga nahihidabi ha diri mag upay nga mga buruhaton. Lakip na dinhi an nagpapadayon nga imbistigasyon ha lima nga mga kapulisan han Ormoc City nga suspetsyado ha pagpatay han 60 anyos nga babaye ha Kananga, Leyte.
Sumala kan PRO8 Spokesperson PCInsp. Ma. Bella Rentuaya, nga hira in nananawagan nga diri unta mawara an pagtapod han mulopyo ngan diri iglakip an bug-os nga organisasyon han PNP ha magraot nga gin bubuhat han pipira nga mga kapulisan ha rehiyon.
Sumala kan Rentuaya, nga basi han mandato ni PRO8 Regional Director Gilberto Cruz nga tagan dayon hin award an mga nagbubuhat hin maupay nga mga kapulisan ngan sugad man an paghatag dayon hin naaangay nga sirot ha mga kapulisan nga nagbubuhat hin illegal o kriminal nga mga buruhaton.
Ha pagka yana, napapailarom na ha restricted custody han Police Regional Office 8 an upat nga police han Ormoc ngan gin iimbistigahan han Regional Internal Affairs Service han PNP.
