Limang indibidwal na may kinakaharap na magkakaibang kaso ang naaresto sa magkakahiwalay na operasyon ng pulisya sa iba’t ibang bayan at lungsod sa Pangasinan kahapon, Enero 14, 2026.
Bandang alas-siyete ng umaga, inaresto ng Anda Municipal Police Station ang isang 26-anyos na lalaki sa Anda, Pangasinan sa bisa ng warrant of arrest para sa kasong theft, na may inirekomendang piyansang ₱6,000.00.
Dakong ala-una ng hapon, isang 56-anyos na babae naman ang inaresto ng San Nicolas Municipal Police Station sa San Nicolas, Pangasinan dahil sa kasong cyber libel, batay sa warrant of arrest na may inirekomendang piyansang ₱10,000.00.
Sa Dagupan City, bandang alas-nuebe ng umaga, nadakip ng Police Station 1, katuwang ang iba pang yunit ng Dagupan City Police Office, ang isang 26-anyos na lalaki na nahaharap sa kasong rape. Walang inirekomendang piyansa para sa nasabing kaso.
Samantala, bandang alas-onse ng umaga, inaresto ng San Carlos City Police Station ang isang 52-anyos na lalaki sa Barangay Bugallon-Posadas Street, San Carlos City dahil sa paglabag sa Section 38 (D) ng Republic Act No. 11223 o Universal Health Care Act, na may inirekomendang piyansang ₱36,000.00.
Bandang alas-singko ng hapon, nadakip din ng Bayambang Municipal Police Station, katuwang ang 105th Maneuver Company ng RMFB1, ang isang 18-anyos na lalaki sa Mangatarem, Pangasinan sa bisa ng warrant of arrest para sa paglabag sa Article 308 kaugnay ng Article 309 ng Revised Penal Code, na may inirekomendang piyansang ₱10,000.00.
Ang lahat ng naarestong indibidwal ay kasalukuyang nasa kustodiya ng kani-kanilang himpilan ng pulisya para sa wastong dokumentasyon at pagsasampa ng kani-kanilang kaso.
