Davao City – Usa ang kumpirmadong nakabsan sa kinabuhi samtang upat ang samdan didto sa Matanao, Davao del Sur human nasinatian ang Magnitude 6.9 nga linog kagahapon diin sentro kun epicenter kini sa pagtay-og.
Sa pakighinabi sa DXDC RMN Davao kang PSSG Ronalyn Gomez, PIO sa Matanao Police, ang maong ihap naggikan sa initial pa lamang nga reports gumikan sa pagkakaron, padayon pa ang monitoring ug pagsuta sa damyos sa naasoyng lugar human sa linog.
Una nang gikareport nga namatay ang usaka sais anyos nga batang babaeng giilang si Cherbelchen Imgador, taga Barangay Asinan human wala kini nakagawas sa ilang nahugmak nga balay.
Samtang anaa sa kapin usaka gatus ka mga balay nadamyos sa pagtay-og gani dunay gipahigayon karon nga meeting ang lokal nga gobyerno sa Matanao uban ang mga concerned agencies bahin sa posibleng bakwitan sa mga naapektuhan sa linog.
“Daghan, sa poblacion area lang kay halos balay kay partially damaged. Naay area nga totally damaged ang mga balay pud sa Poblacion… Usa na karon sa gi-meetingan sa among LGU ug magbuhat ba sila og laing evacuation center,” segun ni Gomez.
Naguba usab ang Municipal Hall sa Matanao diin nakitaan kini og guba samtang namatikdan ang mga liki sa ubang kadalanan.
Subay niini, nanawagan ang kapulisan sa mga naapektuhan sa lugar nga makig-koordinar gilayon sa lokal nga gobyerno aron matunolan sila og asistinsya.
RadyoMaN Renz Barbarona
