Nagapabilin karon nga napriso kag magapangatubang sang kaso nga paglapas sa COMELEC liquor ban ang 24 anyos nga lalaki nga gindakop sang mga pulis bangud sa pag-inum sang makahulubog nga ilimnon kahapon sang kaagahon sa pagsugod sang liquor ban angut sa SK kag Barangay elections.
Sa interview sang RMN Iloilo ginpahayag nu Police Inspector Oman Bryndel Estabillo, hepe sang Igbaras PNP nga mga alas 10 sang Sabado sang gab-i naghiwat sila sang pagpatrolya kag ila nakit-an ang pila ka grupo sang kalalkin-an nga naga-inum-inum sa plaza sang Igbaras kon sa diin may ginahiwat nga food festival.
Suno kay Estabillo nga ila gin-warningan ang mga naga-inum nga untatan na ang pag-inum bangud maga-epekto na ang liquor ban pag-abot sang alas 12 sang tungang gab-i.
Gindugang pa ni Estabillo nga pagkatapos sang ila ginhatag nga warningh, naglibot naman sila sa iban nga lugar kag pag-abot sang alas 12 sang tungang-gab-i, liwat sila nagbalik sa plaza apang padayon sa gihapon nga naga-inum ang grupo sang suspek nga si Colen Eraldo kabangdanan ila na ini ginpapuli kag ginpahimus ang mga ilimnon.
Makaligad ang duha ka oras, nagbalik naman ang mga pulis sa p[laza kag didto nakita nila sa gihapon si Eraldo nga may gina-uyatan nga botelya sang beer kag isahanon na lang nga nagainum sa covered gym kabangdanan ila nga giun saway kag ginapapuli apang indi gihapon magpati kag nagapakatig-a.
Bangud sini, napilitan ang mga pulis nga bitbiton ini pakadto sa police station kag gin-priso kag ginpasiguro ni Estabillo nga pasakaan nila ini sang kaso nga paglapas sa election liquor ban.
