Davao City – Sa pagbakwi sa lokal nga kagamhanan sa 24-hour liquor ban sugod karong adlawa, ang dagan sa ekonomiya sa dakbayan sa Davao gilaumang mubalik usab ka agresibo uban ang kalagsik taliwala sa nasinatiang national public health emergency.
Segun ni Barangay 10-A Poblacion Kagawad Armand Amancio, karon nga wagtangon na ni Mayor Sara Duterte-Carpio ang 24-hour liquor ban, gilaumang mahibalik usab ang mga pamatigayon.
Matud ni Amancio, suportado niya ang aksiyon sa kagamhanang lokal sa katarongan nga ang gobyerno nagkinahanglan og pagbakod pag-usab sa nasudnong ekonomiya gumikan sa kadaghan sa ayudahan kinsa naapektaran sa krisis.
Dugang punto ni Amancio mao nga ang mga negosyante sa industriya sa kalingawan panahon sa kagabhion labaw nang naghandum makabalik sa ilang mga negosyo aron makabangon sa ilang pagkahapla diin ang ilang mga trabahante makapanginabuhi pag-usab nga dakung puntos aron makibhangan ang kargahunon kon tabanganan sa gobyerno.
RadyoMan Joel Viray
