Davao City – Gisuportahan karon ni Davao City First District Councilor J. Melchor Quitain ang ‘One-Strike Rule’ batok sa mga establisimyento nga mosupak sa kinatibuk-ang unod sa mando ni Mayor Sara Duterte-Carpio nga 24-hour Liquor Ban revival.
Matud ni Quitain, walay siyay duda sa halapad nga basihan sa hukom sa City Government denhe sanglit tanang mga order kun direktiba klaro man nga lawom nga gitun-an una kini gi-desisyonan nga sagopon kontra COVID-19.
Dugang ni Quitain nga bisan tuod og ‘One-Strike Policy’ ang thrust sa direktiba, pag-abot sa enforcement, adunay igong discretion ang enforcers kung sirad-an ba dayon o dili ang establisimiyento nga makasupak sa EO 59.
Gi-awhag usab ni Quitain ang tanan nga sundon ang 24-hour liquor ban sanglit temporaryo lamang kini diin daku usab ang purohan nga bakwion ra usab sa dihang mo-improbar kun mo-alibyo na unya ang atong sitwasyon-medikal.
“Sa mga issuances ni Mayor Inday Sara Duterte-Carpio, suporta gyod ko 101% kay giplano gyod na and I’m sure na-discuss na ug dili na mag-issue si Mayor kung wala niya ma-studyhan…Nganong supakon man nga ma-lift ra man pod na, dili man na one year nga ban and I’m sure, naa pod na’y limit,” segun ni Quitain.
RadyoMaN Joel Viray
