Liquor ban September 21 lifting gikalipay

20

Davao City – Gikalipay karon ni Second District Councilor Danilo Dayanghirang ang nagkaduol nang pagbakwi sa lokal nga kagamhanan sa liquor ban dinhi sa dakbayan sa Davao.

Matud ni Dayanghirang, ikalipay gayud sa pipila ka katawhan ang liquor ban lifting ilabi na niadtong nagsalig sa liquor industry sama sa gobyerno ug mga trabahanteng konektado sa naasoyng sektor.

Kahinumduman nga dungan sa pagpatuman sa community quarantine and control measures sa tibuok dakbayan mao ang pagpatuman usab sa pagdili sa pagbaligya ug pag-inom sa ilimnong makahubog nunot sa hulga sa COVID-19.

Sumala ni Dayanghirang, moabot na sa P1B ang nawala sa ekonomiya diin dili moubos sa P100M ang nakibhang nga buhis bunga sa pandemic.

Gibati karon ug kabalaka si Dayanghirang nga basin mas musamot pa og kahagba ang ekonomiya sa dakbayan kon molungtad pa ug 2021 ang COVID-19 public health emergency crisis diin mas daku pa unya ang mawala nga buhis sa panudlanan sa gobyerno gikan sa liquor industry.

Tambag ni Dayanghirang sa tanan nga kon mag-inom, himoon na lamang kini sulod sa ilang tagsa-tagsa ka mga panimalay ug dili diha sa gawas aron sa ingon malikayan ang takod sa makamatay nga sakit nga niigo na ug kapin 29M confirmed cases sa global COVID-19 situational dashboard and statistics.

“Lipay pod ang gobyerno (sa liquor ban lifting) kay daku man og buhis ang ilimnon…Mosugot ta’g sa dili, bangkarota ang economy ani (diin) sunod tuig, ang mawala sa gobyerno muabot og mga kulang-kulang usa ka bilyon (ka pesos),” panapos sa konsehal.




RadyoMaN Joel Viray

Facebook Comments