Davao City- Dili gyud makalingkawas sa hulga ang syudad sa Davao, human sa pagpamomba sa Roxas Night Market sa nakalabay’ng tuig.
Sumala ni kanhi Davao City Police Office Director Police Chief Supt.Michael John Dubria, bisan ug wala pa mahitabo ang Roxas Night Market Bombing, daan nang adunay hulga ang dakbayan ilabina sa dihang midaug si kanhi Davao City Mayor ug karon Presidente Rodrigo Duterte. Giingon niya, target gyud sa mga dautang elemento ilabina sa mga terorista, ang mga nag-unang syudad sa Mindanao usa na niini ang dakbayan sa Davao.
Samtang sa giingong nalampasan na ba ang mapait nga kasinatian human sa pagpamomba sa mga biktima ug tagtungod sa mga namatay, usa na ka tuig ang nakalabay. Matud ni Dubria, dili sayon kung mawad-an ka ug minahal sa kinabuhi.
Matud ni Dubria, dili tanang mga tagtungod sa mga namatay ug biktima, ang makadawat sa hustisya, bisan ug nagpadayon ang kaso batok sa mga nag-unang suspetsado sa pagpamomba, tungod kay managlahi ang panlantaw sa pagdawat sa kamatuoran. Ang uban moingon isalig na lang sa dios, samtang ang uban gusto gayud ug hustisya.
Aron adunay makitang kausaban sa seguridad ilabina sa syudad, tambag sa kanhi hepe sa Davao City Police Office mao ang makanunayong pagbantay ug pagpahibalo sa mga awtoridad kabahin sa mga makitang kadudahang butang ug mga tawo sa inyong lugar alang sa kaluwasan sa tanan ug sa umaabot pang mga panahon.
Kasamang Bernard Pantallon
