Davao City – Sikop sa Calinan PNP ang usa ka live-in partner human kini nakuhaan og shabu atol sa gilusad nga buy bust operation alas 4:53 sa kahaponon sa Bukidnon Road Calinan siyudad sa Davao.
Subay sa report ang maglive-in partner nga nadakpan mao sila si Mark Sendy Sadia, 24 anyos, taga Purok 30 Roman Diaz St.Calinan ug Joy Dizon Alvarado, 24 anyos residente sa Purok 8 Brgy.Gumalang Baguio district ning siyudad.
Sa dihang gikasa ang buy bust operation didto sa nasampit nga lugar usa ka police ang nagtakuban nga poseur buyer ug iyang gitunol ang P500.00 nga buy bust money bugti sa usa ka sachet nga shabu ug didto wa ka bantay ang mga suspek nga mga police ang ka-transact niini hinungdan sa pagkasikop.
Narekober sa kapulisan gikan sa ilang posisyon ang duha ka sachet nga gituohan shabu, usa ka Q-plus Cellular phone ug ang buy bust money nga P500.00.
Ang mga dinakpan balhug na sa Calinan PNP ug gihikay na ang kasong kalapasan sa R.A 9165 kun Comprehensive Dangerous Drug Act of 2002.
Sumala ni Police Chief Inspector Michael Uyanguren, station commander sa Calinan PNP, bag-o kini nga nailhan nga mga drug personalities sa datus sa Calinan. Nasayran nga upat na ang nadakpan sa Calinan PNP samtang upat na sab ka mga dinakpan sa Bunawan PNP ang nasikop nga nagapayuhot ug iligal nga droga sukad gipabalik ang oplan tokhang sa kapulisan.
RadyoMaN Don Pulayao
