Davao City – Lisod gayud karon ang panahon maoy hinungdan nga sa tan-aw nako, mas ikalipay sa katawhan kun magmando ang gobyerno sa bag-ong usbaw kun increase sa sweldo across-the-board sa yanong mga trabahanteng lungsuranon sama nimo ug sama nako.
Gikinahanglan gayud nato kini sanglit dili man mapugngan ang pagsutoy sa presyo sa mga palaliton sa merkaduhan, sa presyo sa lana ug gasolina, abang kun renta sa balay, monthly amortizations, enrolment ug tuition kun matrikula, school supplies, pagkaon, baon, pamlete, diapers, gatas, immunization kun bakuna ug arang kadaghan pang uban!
Unta ma-realisar usab sa estado nga makatabang kini’g daku uyamot ngadto’s katawhan kun magmando kini sa pagpugong sa price increase sa mga inadlaw-adlaw’ng panginahanglanon sa matag pamilya sama sa bugas ug prime commodities sa merkaduhan ug usab ang pag-regulate sa presyo sa lana kay kun mosaka kini, matingala man ta’g dili sab mo-arangkada ang gasto sa panakayan!
Panahon na usab karon arong atong ipahinumdom sa tanan nga magdinaginot gayud ug taman, wad-on ang tanang matang sa bisyo, dili paturagas sa pagpanganak ilabi na kun walay sufisyenteng panarbaho ug uban pang kritikal nga medyos aron makasustiner ug mo-survive kita sa malisud kaayo nga panahon karon.
RadyoMaN June Duterte
