Davao City – Maayo ang nahimong resulta sa unang hugna sa massive vaccination campaign kontra polio nga gipasiugdahan sa Department of Health (DOH) sa pakigtambayayong sa City Health Office (CHO) diha sa Barangay 9-A, ning syudad.
Matud ni Barangay Captain Tata Llubit, nahurot og suroy ang mga purok sa mga taga-DOH ug CHO uban ang mga sakop sa Barangay Health Worker (BHWs) sector sa pagbakuna sa mga kabataan nga nag-edad og singko anyos paubos.
Gibanabanaan ni Llubit nga mukabat sa 98% sa mga bata sa iyang barangay nabakunahan bunga sa paghago sa ahensiya sa panglawas nga malukop sa kampanya batok polio ang tibuok barangay.
Dugang ni Llubit, nakatabang sa kampanya ang pagpasabot sa kalainan tali sa Dengvaxia vaccine kontra sa anti-polio vaccine hinungdan nga misugot ang mga ginikanan nga mabakunahan ang ilang mga anak.
Hinoon, aminado ang kapitan nga adunay pipila hinoon ang padayong nagmagahi sa pagdawat sa libre nga bakuna sa gobyerno, busa wala na lamang nila gipugos ang mga ginikanan kinsa sirado pa ang panghunahuna sa importansya sa bakuna kontra polio.
Sa pagkakaron, mag-alokar na usab og laing pondo ang Barangay 9-A sarang magamit alang sa panginahanglanon sa mga personahe sa DOH ug CHO kinsa subling manguna sa ikaduhang hugna sa anti-polio vaccination campaign karong adlawa November 25 hangtud December 7 ingon man ang January 6-18 nga third and last leg or segment sa ‘Sabayang Patak Kontra Polio’ massive vaccination drive sa Duterte administration.
RadyoMan Joel Viray
