Davao City – Ubay ubay sumala pa ang mi-partisipar sa Local Absentee Voting dinhi sa Davao region subay sa pamahayag sa Commission on Election (COMELEC).
Sa pakighinabi sa DXDC RMN Davao kang Atty. Krisna Samantha Caballero, spokesperson sa COMELEC-XI, gibutyag niini nga kini gisugdan niadtong Lunes, Abril 29, 2019 ug mahuman sa Mayo 1, 2019 diin mipatisipar ang kasundalohan ingon man mga magtutudlo.
Segun ni Caballero nga pinaagi niini mahatagan og oportunidad ang mga indibidwal nga makaboto ayha pa man ang eleksyon tungod sa ilang mga responsibilidad nga kabahin sa pagpahigayon sa pinili-ay.
“Sa atong absentee voting, mahatagan nato og higayon nga makaboto kadtong mga madestino o temporarily mugawas sa ilang area aron nga magrender og election services sama sa atong mga pulis ug kasundalohan,” pagpasabot ni Caballero.
Samtang gikumpirma usab ni Caballero nga aduna usay mga na-disapproved nga application sa local absentee voting tungod kay wala nakapa rehistro, wala nakapa biometrics, o kaha ang wala nakaboto og duha ka sunod-sunod nga eleksyon.
Tambag sa opisyal sa nahisgutan nga human eleksyon, kinahanglang magpa-rehistro o kaha i-update ang ilang aplikasyon aron makapartisipar sa sunod nga eleksyon.
RadyoMaN Kirby Manzon
