Davao City – Aduna sumala pay tulubagon ang mga local chief executives kung pakyas niining mapatuman ang kamanduan sa Department of Interior and Local Government (DILG) nga pagtukod og Barangay Isolation Unit (BIU) gumikan sa COVID-19 (Corona Virus Disease 2019).
Sa interbyu sa DXDC RMN Davao kang Alex Roldan, Regional Director sa DILG-XI, gibutyag niini nga isip empleyado sa gobyerno, normal lang nga manubag kung pakyas nga mabuhat o mapatuman ang mando o adunay pagpabaya niini.
“Kung dunay mga lapses nga iyang mahimo. Kung dunay nahitabo sa iyang munisipyo unya nakita nga dunay siyay pagpabaya sa iyang trabaho then naa gyud siyay tulubagon. Normal na siya pagpanarbaho sa gobyerno,” saysay ni Roldan.
Gibutyag ni Roldan nga obligado ang mga mayor nga manguna sa maong kamanduan pinaagi sa koordinasyon sa mga barangay officials ingon man sa Department of Health (DoH) aron sila magiyahan.
Dugang sa DILG-XI Regional Director nga wala may gihatag nga timeline alang sa maong proyekto apan subay sa order, kinahanglang mapatuman kini sa mas dali nga panahon.
RadyoMaN Kirby Manzon
