Davao City – Alang ni New Guardian for Freedom and Democracy National President Tito Porras nga walay pulos makig-istorya og kalinaw uban sa CPP-NPA-NDF kay gamiton lamang nila kini aron pakusgon ang ilang pwersa.
Gani, kahinumduman mao kini ang rason ngano napugos ang nasudnong gobyerno sa pagpahunong sa peace talk pipila ka buwan na miagi.
Pabor unta si Porras sa localized peace talk sanglit mas maayo masuwayan og istorya ang ground level, apan sa tan-aw niya wala gihapoy padulngan ang paningkamot ni Mayor Inday Sara Duterte-Carpio kay dili musalir ang localize peace talk tungod nag-agad ra ang mga npa sa mando sa ilang mga labaw sa Central Committee.
Sa kasinatian ni Porras sa peace negotiation, makasulti kini nga dili tulay ang peace talk aron mabatunan ang kalinaw sa punto nga igo lang duwaan sa mga kumunista ang gobyerno.
Apan kun pursegido ang kagamhanan sa pagbungkag sa CPP-NPA-NDF, butangan og political will ang pakig-away kanila sa ingon maputol na sa hingpit ang ilang kamang-tas sa mga tawo.
Sa gipakita sa CPP-NPA-NDF sa peace talk, dili dayon dapat musalig ang lokal nga kagamhanan kanila kun matigayon ang localized peace talk uban sa mga NPA diri sa Davao City.
Angay hinuklugan ni Mayor Inday Sara nga bayolente og panghunahuna ang mga komunista ug dili sila magduha-duha sa pag-atake ngadto sa mga men in uniform ug sa mga sibilyan.
Sa katapusan, mas maayo obligahon ug pugson ang CPP-NPA-NDF sa pagtahan sa ilang mga armas aron dili sila makahimo og atake sa militar o sibilyan kun matuman ang localized peace talks nga giduso sa lokal nga kagamhanan.
RadyoMaN Joel Viray
