Gin-confirm ni Mayor Richard Jaojoco sang banwa sang Toboso nga ini sila ang magapatigayon sang LOCKDOWN kag indi Enhanced Community Quarantine (ECQ) sa maabot nga Marso 30 tubtob Abril 5.
Ginpahayag ni Jaojoco sa DYHB, nga ang ini nga tikang ang gin kasugtan upod sa mga Punong Barangay sa siyam (9) ka mga barangay sa amo nga banwa.
Ini nga desisyon sang banwa ang ginakabig nga testing kit suno kay Jaojoco para ila gid ma monitor kun bala may yara sang positibo ukon wala sang corona virus disease sa ila nga lugar, bangud sa LOCKDOWN nga ila pagapatigayunon sa sulod sang isa ka semana wala sang may maka guwa sa ila nga puluy-an kag ang banwa amo ang magasuporta sang ila nga pagkaon.
Dugang pa ni Jaojoco nga matapos ang pito ka adlaw nga lockdown, ila paga-istoryahan upod sa mga kapitanes sang siyam ka barangay kun bala ila iga downgrade ukon panubuon sa enhanced community quarantine sa maabot nga Abril 6 tubtob Abril 14 kaangay sang ginapatuman sa bilog nga probinsya sang Negros Occidental.
Ang banwa sang Toboso ang may ginapreparar na nga mga food packs sa kapin 50 mil ka mga pumuluyo nga gina bug-usan sang 10 mil ka mga households.
