Walay lockdown matag gabii nga gipatuman sa Marawi City human ang Martial Law sa Mindanao, alas-12:00 sa tungang gabii niadtong Diyembre 31.
Apan nagpadayun ang curfew sugod alas-12:00 sa tungang gabii hangtud alas-4:00 sa kadlawon, adjusted time kini sa unang curfew nga alas-10:00 sa gabii hangtud alas-5:00 sa sayo’ng buntag.
Matud pa ni Col. Jose Maria Cuerpo, commander sa 103rd Infantry Brigade nga dunay jurisdiction sa Marawi City ug Lanao del Sur, nga ang padayung pagpatuman sa curfew nag-base sa gi-aprubrahang hangyo o request sa Provincial Peace and Order Council atol sa emergency menting niadtong Disyembre 27 sa nakalabay’ng tuig.
Sa iyang open letter ngadto kang Defense Secretary Delfin Lorenzana, nangayo og katin-awan ang residenteng si Drieza Lininding sa padayon nga lockdown, matud pa, sa Marawi City gamit ang Presidential Proclamation 55, nga gipirmahan ni Presidente Rodrigo Duterte human ang pagpamomba sa Davao City niadtong tuig 2016.
Imbes nawala na, matud pa, ilang kahadlok tungod sa pagwagtang sa Martial Law, magpabilin paman diay kini tungod sa ‘lockdown’.
Gipasabot ni Cuerpo nga ang ‘lockdown’ walay tugutang makasulod og makagawas sa usa ka lugar ug ipatuman kini hangtud sa wala matinong panahon apan ang curfew dunay oras nga kini ipatuman ug libre nga makasulod ug makagawas ang bisan kinsa kung panahon sa emerhensiya o dunay koordinasyon.
