LOG taxi, ginpa-quarantine ang driver nga nagdul-ong sa bata nga Chinese sa ospital

103

Bilang kabahin sang safety measures, ginpaidalum sa self quarantine sang Light of Glory (LOG) Taxi services ang driver nga nagdul-ong sa tatlo ka tuig nga bata nga Chinese sa Qualimed Hospital nga nahilanat kag ginasuspetsahan nga may novel coronavirus.

Suno sa tagdumalahan sang LOG, apesar indi kumpirmado kon may novel coronavirus ang bata, mas maayo nga makapanigurado.


Magluwas sa driver, ila man ginpainitan, gintinluan kag wala anay ginpabiyahe ang taxi nga gingamit dul-ong sa bata.

“Ginpaliguan to siya…subong wala siya anay namon ginpabiyahe for 5 days… Kon negative man to siya maayo… kag para man ini sa safety sang pasahero, sang pamilya ya kag kaupod ya man nga drivers,” ang pahayag ni Gloria Buenavista, personnel supervisor sang Light of Glory Taxi sa exclusive interview sang RMN Iloilo.

Suno kay Buenavista, ang mga driver sang LOG antes maggwa sa garahe ginapa-alcohol anay, may tissue, may habon, may mask, kag ginadis-infect ang salakyan para sa safety sang mga driver kag mga pasahero.

Gin-athag man ni Buenavista nga matapos dul-ong sang driver sa Chinese nga bata, naka pick-up pa ini sang isa ka pasahero antes nila na-recall kag ginpabalik sa garahe.




Alas 3 kahapon sang hapon, halin sa Qualimed Hospital, sinsaylo ang bata nga Chinese sa Western Visayas Medical Center (WVMC) nga amo ang referral ospital sang DOH sa mga sakit nga ginasuspetsahan novel coronavirus.

Sa karun, indi pa kumpirmado kon ang hilanat nga ginabatyag sang Chinese nga bata ma-angot sa sakit nga novel coronavirus.

Una na ginpahayag sang DOH 6 nga wala pa sang kumpirmado nga kaso sang novel coronavirus sa Pilipinas.

IN PHOTO: Ang taxi nga ginsakyan sang bata nga Chinese upod ang iya ginikanan padulong sa ospital. Ang ini nga taxi wala na anay ginpabiyahe sang Light of Glory.

Facebook Comments